ਸ਼ੋਰ ਨੂੰ ਸੁਣ ਕੇ ਐਵੇਂ ਆਹਾਂ ਭਰਦੇ ਨਹੀਂ ਹੁੰਦੇ ।
ਕਾਵਾਂਰੌਲੀ ਕੋਲੋਂ ਬਾਜ਼ ਤਾਂ ਡਰਦੇ ਨਹੀਂ ਹੁੰਦੇ ।
ਮੈਂ ਇਸ਼ਕ ਵਿਹੂਣੇ ਲੋਕਾਂ ਨੁੰ ਹੋਰ ਕੀ ਕਹਿਣਾ ਹੈ,
ਤਰਕਾਂ ਵਾਲੇ ਕੱਚਿਆਂ ਉੱਤੇ ਤਰਦੇ ਨਹੀਂ ਹੁੰਦੇ ।
ਸਾਉਣ ਚ ਲੱਗੀ ਇੱਕ ਝੜੀ ਨੂੰ ਭਰਮ ਜਿਹਾ ਹੋਇਆ,
ਬਰਸਾਤਾਂ ਦੇ ਵਿੱਚ ਵੀ ਸੂਰਜ ਠਰਦੇ ਨਹੀਂ ਹੁੰਦੇ ।
ਆਪਣੀ ਹੋਂਦ ਜਿਨ੍ਹਾਂ ਦੀ ਰੇਤ ਦੇ ਟਿੱਬਿਆਂ ਵਰਗੀ ਹੈ,
ਉਹ ਮੁੱਠੀਆਂ ਵਿਚ ਪੂਰਾ ਅੰਬਰ ਭਰਦੇ ਨਹੀ ਹੁੰਦੇ ।
ਜਿਨ ਪਿੰਡੇ ਤੋਂ ਬ੍ਰਹਿਮੰਡੇ ਦੀ ਗਾਥਾ ਸਮਝੀ ਹੈ,
ਉਹ ਫਿਰ ਵਕਤੀ ਫੇਰ ਬਦਲ ਤੋਂ ਡਰਦੇ ਨਹੀਂ ਹੁੰਦੇ ।
ਸਾਡੇ ਕੋਲੋਂ ਬੱਸ ਪਿੰਡਿਆਂ ਦਾ ਉਹਲਾ ਕਰਦੇ ਹਨ,
ਰੂਹਾਂ ਦੇ ਵਿੱਚ ਵਸਣੇ ਵਾਲੇ ਮਰਦੇ ਨਹੀਂ ਹੁੰਦੇ ।
ਆਪੋ ਆਪਣੀ ਧਿਰ ਨਾ' ਅਮਨ' ਜਾ ਖੜਨਾ ਹੁੰਦਾ ਹੈ,
ਮਰਦ ਵਿਚਾਲੇ ਵਰਗੀ ਕੋਈ ਗੱਲ ਕਰਦੇ ਨਹੀਂ ਹੁੰਦੇ ।
