ਸੋਚ ਬਦਲਣੀ ਚਾਹਵਾਂ ਮੈਂ,
ਦਿਲ ਨਾ ਮੰਨਦਾ, ਰੂਹ ਨਾ ਮੰਨਦੀ ।
ਕਹਿੰਦੇ ਲਾਈ ਤੋੜ ਨਿਭਾਉਣੀ,
ਕਿੰਝ ਇਹਨਾਂ ਸਮਝਾਵਾਂ ਮੈਂ ।
ਸਹੁੰ ਖਾ ਕੇ ਜੋ ਮੁੱਕਰ ਜਾਂਦੇ,
ਉਹਨਾਂ ਵਰਗੀ ਬਣ ਜਾਵਾਂ ਮੈਂ ।
ਦਿਲ ਕਿਸੇ ਨਾਲ ਨਾ ਲਾਵਾਂ,
ਆਪਣੇ ਤੋਂ ਇਹ ਚਾਹਵਾਂ ਮੈਂ ।
ਵੱਡੇ ਵੱਡੇ ਵਾਅਦੇ ਕਰਕੇ,
ਜਿਹੜੇ ਰਸਤੇ ਬਦਲ ਗਏ ।
ਮਿੱਟੀ ਨਾਲ ਮਿੱਟੀ ਬਣ ਚੰਬੜੇ,
ਕਿੱਦਾਂ ਤਨ ਤੋਂ ਲਾਹਵਾਂ ਮੈਂ ।
ਸੱਧਰਾਂ ਸਾਡੇ ਨਾਲ ਨੇ ਰੁੱਸੀਆਂ,
ਸੱਜਣ ਕੋਲੋਂ ਭਾਲਣ ਖ਼ੁਸ਼ੀਆਂ ।
ਡਰਦੀ ਪੈੜ ਦੱਬ ਕੇ ਤੁਰਦੀ,
ਲਵਾਂ ਨਾ ਉੱਚੀ ਸਾਹਵਾਂ ਮੈਂ ।
ਜਿਹਨੂੰ ਹਰ ਗਿਲਾ ਦੱਸੀਏ,
ਰੂਹ ਨਾਲ ਪਿਆਰ ਬੁਲਾ ਹੱਸੀਏ ।
'ਸਰਬ' ਜਿਹੇ ਦਿਲਦਾਰ ਦਿਲਾ,
ਕਿੱਥੇ ਜਾ ਕੇ ਗਾਹਵਾਂ ਮੈਂ ।
ਸੋਚ ਬਦਲਣੀ ਚਾਹਵਾਂ ਮੈਂ ।
