ਸੋਚਾਂ ਦੇ ਆਲਣੇ ਵਿਚ ਯਾਦਾਂ ਸੰਭਾਲ ਰੱਖੀਂ ।
ਇਹਨਾਂ ਦੇ ਪੰਖ ਕੋਮਲ ਏਨਾ ਖਿਆਲ ਰੱਖੀਂ ।
ਸੁਬਹਾ ਜੋ ਤੁਰ ਗਏ ਨੇ ਪਰਤਣਗੇ ਸ਼ਾਮ ਵੇਲੇ
ਦੀਵੇ ਤੂੰ ਆਸ ਦੇ ਕੁਝ ਮਮਟੀ 'ਤੇ ਬਾਲ ਰੱਖੀਂ ।
ਸ਼ੀਸ਼ੇ ਦਿਆਂ ਘਰਾਂ ਵਿਚ ਮਰ ਜਾਣ ਨ ਇਹ ਕਿਧਰੇ
ਤੂੰ ਮਛਲੀਆਂ ਦੀ ਖਾਤਰ ਸਾਗਰ ਵੀ ਭਾਲ ਰੱਖੀਂ ।
ਜਾਦੂ ਤੇਰੀ ਕਲਮ ਦਾ ਸਿਰ ਚੜਕੇ ਬੋਲਦਾ ਏ
ਹਰਫਾਂ 'ਚ ਆਪਣੇ ਤੂੰ ਭਰਿਆ ਕਮਾਲ ਰੱਖੀਂ ।
ਪੌਣਾਂ ਤੇ ਪਤਝੜਾਂ ਤੋਂ ਪੈਣਾ ਬਚਾ ਕੇ ਰੱਖਣਾ
ਕਲੀਆਂ ਦੇ ਹਾਸਿਆਂ 'ਤੇ ਰੰਗਾਂ ਦੀ ਢਾਲ ਰੱਖੀਂ ।
ਤੇਰੀ ਉਡਾਣ ਖਾਤਿਰ ਨੀਵਾਂ ਅਕਾਸ਼ ਹੋਇਆ
ਬਦਲੀ ਦੇ ਵਰ੍ਹਨ ਦਾ ਨ ਮਨ ਵਿਚ ਮਲਾਲ ਰੱਖੀਂ ।
