ਨਾ ਗਾ ਮੇਰੀ ਪਿਆਰੀ ਬਸ ਕਰ ਨਾ ਗਾ ਨੀ
ਮੇਰੇ ਸਾਹਵੇਂ ਜਾਰਜੀਆ ਦੇ ਸੋਗੀ ਗੀਤ
ਦੂਜੇ ਜੀਵਨ ਅਤੇ ਦੁਰਾਡੇ ਕੰਢੇ ਦੀ
ਯਾਦ ਦਿਵਾਉਂਦੇ ਦਿਲ ਮੇਰੇ ਨੂੰ ਮੇਰੇ ਮੀਤ ।
ਹਾਏ ! ਤੇਰੀਆਂ ਇਹਨਾਂ ਜ਼ਾਲਮ ਤਰਜ਼ਾਂ ਤੇ
ਆਉਂਦੀ ਯਾਦ ਚਾਨਣੀ ਰਾਤ, ਮਦਾਨਾਂ ਦੀ
ਦੂਰ ਰਹਿ ਗਈ ਜਿਹੜੀ ਨਜ਼ਰਾਂ ਤੋਂ ਓਹਲੇ
ਮੰਦਭਾਗੀ ਮੁਟਿਆਰ ਦੇ ਨਕਸ਼ਾਂ ਨੈਣਾਂ ਦੀ ।
ਜੇ ਤੂੰ ਹੋਵੇਂ ਸਾਹਵੇਂ ਤਾਂ ਭੁਲ ਜਾਵੇ ਜੋ
ਮੋਹਣਾ ਮਾਰੂ ਪਰਛਾਵਾਂ ਮੰਡਲਾਉਂਦਾ ਹੈ
ਪਰ ਛੋਂਹਦੀ ਹੈਂ ਗੀਤ ਜਦੋਂ ਤਾਂ ਉਹ ਮੁੜਕੇ
ਸਾਹਵੇਂ ਆਣ ਖਲੋਂਦਾ ਅਤੇ ਸਤਾਉਂਦਾ ਹੈ ।
ਨਾ ਗਾ ਮੇਰੀ ਪਿਆਰੀ ਬਸ ਕਰ ਨਾ ਗਾ ਨੀ
ਮੇਰੇ ਸਾਹਵੇਂ ਜਾਰਜੀਆ ਦੇ ਸੋਗੀ ਗੀਤ
ਦੂਜੇ ਜੀਵਨ ਅਤੇ ਦੁਰਾਡੇ ਕੰਢੇ ਦੀ
ਯਾਦ ਦਿਵਾਉਂਦੇ ਦਿਲ ਮੇਰੇ ਨੂੰ ਮੇਰੇ ਮੀਤ ।
