ਸੂਹੇ ਖ਼ਿਆਲਾਂ ਨੂੰ ਮਾਨਣ ਦੀ ਕੀਮਤ ।
ਮਰ ਕੇ ਚੁਕਾਈ ਮੈਂ ਮਹਿਕਣ ਦੀ ਕੀਮਤ ।
ਸੁੱਤੇ ਰਹੇ ਵੇਚ ਘੋੜੇ ਸਦਾ ਜੋ,
ਮੈਨੂੰ ਆ ਦੱਸਦੇ ਨੇ ਜਾਗਣ ਦੀ ਕੀਮਤ ।
ਤੇਰੀ ਮੁਹੱਬਤ ਲੁਕਾਈ ਦੁਨੀ ਤੋਂ,
ਦੁਨੀਆਂ ਕੀ ਜਾਣੇ ਲੁਕਾਵਣ ਦੀ ਕੀਮਤ ।
ਮੈਨੂੰ ਲੁਟੇਰਾ ਘਰੇ ਆ ਕੇ ਮਿਲਿਆ,
ਮੈਂ ਮੰਗ ਲਈ ਦਿਲ ਲੁਟਾਵਣ ਦੀ ਕੀਮਤ ।
ਬੁੱਕਲ ਤੇਰੀ ਵਿੱਚ ਨਿਕਲੇ ਜੋ ਹੰਝੂ,
ਕਰ ਗਏ ਅਦਾ, ਕੁੱਲ ਹੱਸਣ ਦੀ ਕੀਮਤ ।
ਖਾਰਾਂ ਵਿਚਾਲੇ ਗੁਜ਼ਾਰਨ ਉਹ ਜੀਵਨ,
ਫੁੱਲਾਂ ਨੂੰ ਪੁਛਿਉ ਕੀ ਟਹਿਕਣ ਦੀ ਕੀਮਤ ।
ਮੈਂ ਪੈੜ ਤੇਰੀ ਚ ਰੱਖਣੇ ਕਦਮ ਨੇ,
ਲੈਣੀ ਕੀ ਦੱਸ ਨਾਲ ਰੱਖਣ ਦੀ ਕੀਮਤ ।
ਹੋਠਾਂ ਦੇ ਜ਼ਖਮਾਂ ਨੇ ਦੱਸੀ ਕਹਾਣੀ,
ਤਾਰੀ ਕਿਵੇਂ ਫੁੱਲ ਚੁੰਮਣ ਦੀ ਕੀਮਤ ।
