ਸੂਰਜ ਖਿੱਚ ਲਿਆਣ ਦਾ ਵਾਅਦਾ ਕੀਤਾ ਏ ।
ਮੈਂ ਧਰਤੀ ਰੁਸ਼ਣਾਣ ਦਾ ਵਾਅਦਾ ਕੀਤਾ ਏ ।
ਮੈਂ ਦੁੱਖਾਂ ਦੀ ਗਠੜੀ ਤੱਕ ਕੇ ਨਹੀਂ ਡਰਦਾ,
ਤੂੰ ਜੋ ਹੱਥ ਪਵਾਣ ਦਾ ਵਾਅਦਾ ਕੀਤਾ ਏ ।
ਜਦ ਤੱਕ ਸਾਹ ਨੇ ਆਪਣੀ ਗੱਲ ਤੇ ਕਾਇਮ ਹਾਂ,
ਤੂੰ ਮੈਨੂੰ ਭੁੱਲ ਜਾਣ ਦਾ ਵਾਅਦਾ ਕੀਤਾ ਏ ।
ਮਾਰੂ ਪਾਲੇ ਆਏ, ਯਾਦ ਕਰਾ ਦੇਵਾਂ,
ਤੂੰ ਇਸ ਰੁੱਤੇ ਆਣ ਦਾ ਵਾਅਦਾ ਕੀਤਾ ਏ ।
ਤੈਨੂੰ ਖੁੱਲ੍ਹ ਏ, ਛੱਡਦੇ, ਭੁੱਲ ਜਾ, ਚੇਤੇ ਰੱਖ,
ਮੈਂ ਤੇ ਤੋੜ ਨਿਭਾਣ ਦਾ ਵਾਅਦਾ ਕੀਤਾ ਏ ।
ਖ਼ਤ, ਤਸਵੀਰਾਂ, ਲਾਕਟ, ਸੌਂਹ ਈ ਭੁੱਲੀਂ ਨਾ,
ਕੱਲ ਤੱਕ ਤੂੰ ਪਰਤਾਣ ਦਾ ਵਾਅਦਾ ਕੀਤਾ ਏ ।
ਯਾਦਾਂ ਤੇ ਧੁਰ ਅੰਦਰੋਂ ਸੁਰੰਗ ਬਣਾਉਂਦੀਆਂ ਨੇ,
ਤੂੰ ਦਿਲ ਨੂੰ ਸਮਝਾਣ ਦਾ ਵਾਅਦਾ ਕੀਤਾ ਏ ।
ਧੁੱਪਾਂ 'ਸ਼ਾਦ' ਚੁਫ਼ੇਰੇ ਵਲਗਣ ਵਲ ਦਿੱਤੀ,
ਜਦ ਵੀ ਬੋਹੜ ਉਗਾਣ ਦਾ ਵਾਅਦਾ ਕੀਤਾ ਏ ।
