ਬਿਨ ਜਾਗ ਨਾ ਦਹੀਂ ਹੁੰਦੇ
ਜਿਹੋ ਜਿਹੇ ਦਿਸਣੇ ਆਂ,
ਅਸੀਂ ਉਹੋ ਜਿਹੇ ਨਹੀਂ ਹੁੰਦੇ
***
ਗੱਲ ਗੱਲਾਂ ਵਿਚੋਂ ਚੁਣਿਆ ਕਰ
ਵੱਧ ਵੱਧ ਬੋਲਣਾ ਏਂ
ਕਦੇ ਚੁੱਪ ਨੂੰ ਵੀ ਸੁਣਿਆ ਕਰ
***
ਵੰਝਲੀ ਦੇ ਸੁਰ ਛਿੜਦੇ
ਇੱਕ ਤੇਰੇ ਹੱਸਿਆਂ ਚੰਨਾ
ਬੇਮੌਸਮੇ ਫੁੱਲ ਖਿੜਦੇ
***
ਗੱਲ ਮੁੱਕਦੀ ਮੁਕਾ ਛੋੜੀ
ਜ਼ਿੰਦਗੀ ਦੇ ਰੌਲ਼ਿਆਂ ਵਿੱਚ
ਅਸਾਂ ਮੌਤ ਗੁਆ ਛੋੜੀ
***
ਸਾਰੀ ਉਮਰਾਂ ਦੀ ਟੌਹਰ ਹੋਵੇ
ਅਗਲੇ ਜਹਾਨ ਜਾਈਏ
ਸ਼ਾਲਾ!ਉਥੇ ਵੀ ਲਹੌਰ ਹੋਵੇ
***
ਬੰਦ ਇਸ਼ਕੇ ਦੀ ਤਾਕੀ ਏ
ਲਹੌਰ 'ਚ ਰਹਿਨੇ ਆਂ
ਅਜੇ ਜੰਮਣਾ ਬਾਕੀ ਏ
***
ਕੋਈ ਘੁੱਟ ਕੇ ਦਿਲ ਫੜਿਆ
ਇਸ਼ਕੇ ਦੇ ਬੋਛਨ ’ਤੇ
ਬੇ ਰੰਗੀਆਂ ਦਾ ਰੰਗ ਚੜ੍ਹਿਆ
***
ਇਸ਼ਕੇ ਦੀਆਂ ਵੰਡੀਆਂ ਨੀ
ਵਾਏ ਤੈਨੂੰ ਚੁੰਮ ਚੁੰਮ ਕੇ
ਪਈਆਂ ਬੁੱਲ੍ਹਾਂ ਉੱਤੇ ਚੰਡੀਆਂ ਨੀ
***
ਕੋਈ ਸ਼ੌਕ ਸਵਾਦਾਂ ਦਾ
ਇਸ਼ਕੇ ਦੀ ਪੀਂਘ ਚੜ੍ਹੀ
ਰੰਗ ਉਡ ਗਿਆ ਸਾਧਾਂ ਦਾ
***
ਕੋਈ ਸਾਂਦਲ ਬਾਰ ਹੋਈ
ਜੰਮਦਿਆਂ ਸਾਰ ਸਈਓ
ਸਾਨੂੰ ਇਸ਼ਕੇ ਦੀ ਮਾਰ ਹੋਈ
***
ਉਂਝ ਰੱਬ ਦੀਆਂ ਰੱਬ ਜਾਣੇ
ਜਿੰਦ ਉਹਦੇ ਨਾਂ ਲਾਵਾਂ
ਜਿਹੜਾ ਰੱਬ ਦਾ ਸਬੱਬ ਜਾਣੇ
