ਮੇਰੇ ਦਿਲ ਵਿੱਚ ਆ ਗਿਆ
ਕੁੜੀਏ ਤੇਰਾ ਸ਼ਹਿਰ
ਹੌਲੀ ਹੌਲੀ ਖਾ ਗਿਆ
ਪਿੰਡ ਨੂੰ ਤੇਰਾ ਸ਼ਹਿਰ
ਤਿੱਪ ਤਿੱਪ ਕਰਕੇ ਚੋ ਗਿਆ
ਕੀ ਵਗਦੇ ਤੇ ਜ਼ੋਰ ਨੀਂ
ਕੀ ਦਾ ਕੀ ਕੁੱਝ ਹੋ ਗਿਆ
ਮੇਰੇ ਮਨ ਦਾ ਮੋਰ ਨੀਂ
ਘੁਲ ਘੁਲ ਜਾਵੇ ਸ਼ਾਮਾਂ ਵਾਂਗੂੰ
ਮਿਟ ਮਿਟ ਜਾਵੇ ਪੈੜ
ਕੁੜੀਏ ਤੇਰਾ ਸ਼ਹਿਰ
ਬੂਹੇ ਰਹੇ ਉਡੀਕਦੇ
ਮੈਂ ਬੱਦਲਾਂ ਪਿੱਛੇ ਆ ਗਿਆ
ਸਾਰੀ ਪੀੜ ਉਡੀਕ ਦੀ
ਮੀਹਾਂ ਵਿੱਚ ਭੁਲਾ ਗਿਆ
ਮਾਂ ਦੇ ਹੱਥੀਂ ਪਾਥੀਆਂ ਨੇ
ਅਸਮਾਨਾਂ ਤੇ ਗਹਿਰ
ਕੁੜੀਏ ਤੇਰਾ ਸ਼ਹਿਰ
ਛੂੰਹਦਾ ਛੂੰਹਦਾ ਨਦੀ ਨੂੰ
ਮੈਂ ਲਹਿਰ ਇੱਕ ਹੋ ਗਿਆ
ਤੇਰੀ ਅੱਖ ਵਿੱਚ ਦੇਖਦਾ
ਅਥਰੂ ਬਣਕੇ ਚੋ ਗਿਆ
ਤੂੰ ਵੀ ਪਾਣੀ, ਮੈਂ ਵੀ ਪਾਣੀ
ਕੀ ਡੁੱਬਣ ਕੀ ਤੈਰ
ਕੁੜੀਏ ਤੇਰਾ ਸ਼ਹਿਰ
ਢਲੇ ਦਿਹਾੜੇ ਯਾਦ ਦੇ
ਦੂਰ ਬਨੇਰੇ ਹੋ ਗਏ
ਜਿਹੜੇ ਦਿਨ ਸੀ ਢੂੰਢਦੇ
ਦਿਲ ਦੇ ਜੰਗਲੀਂ ਖੋ ਗਏ
ਬਲਦੇ ਬੁਝਦੇ ਤਾਰਿਆਂ ਵਾਂਗੂੰ
ਅੱਖਰਾਂ ਦੇ ਹੱਥ ਪੈਰ
ਕੁੜੀਏ ਤੇਰਾ ਸ਼ਹਿਰ
ਹੌਲੀ ਹੌਲੀ ਖਾ ਗਿਆ
ਪਿੰਡ ਨੂੰ ਤੇਰਾ ਸ਼ਹਿਰ
ਮੇਰੇ ਦਿਲ ਵਿੱਚ ਆ ਗਿਆ
ਕੁੜੀਏ ਤੇਰਾ ਸ਼ਹਿਰ
