ਤੇਰੇ ਬਾਝੋਂ ਝੱਲੀ ਹੋਈ ।
ਸਭ ਦੀ ਹੋ ਕੇ ਕੱਲੀ ਹੋਈ ।
ਜਿਉਂਦੀ ਹਾਂ ਪਰ ਲੱਗਦੀ ਮੋਈ ।
ਤੇਰੇ ਜਿਹਾ ਦਿਖੇ ਹੋਰ ਨਾ ਕੋਈ ।
ਪੀੜਾਂ ਪੀੜ੍ਹੀ ਪੈ ਚੱਲੀ ਹਾਂ,
ਤੇਰੀ ਮਿੱਟੀ ਨਾਲ ਸ਼ਿਕਵੇ ਕਰਨੇ ।
ਮੜ੍ਹੀਆਂ ਹੂੰਝਣ ਚੱਲੀ ਹਾਂ ।
ਚੱਕੀ ਆਟਾ ਲੱਗ ਪਈ ਪੀਹਣ ।
ਦਿਲ 'ਚ ਰੀਝਾਂ ਮੋਈਆਂ ਜੀਣ ।
ਤ੍ਰੇਹ ਲੱਗੀ, ਹੰਝੂ ਲੈਣ ਹਲੂਣੇ ।
ਪੀਤੇ ਪਾਪੀ, ਨਿੱਕ੍ਹਲੇ ਲੂਣੇ ।
ਤੇਰੀ ਯਾਦ ਚ ਹੋਈ ਝੱਲੀ ਹਾਂ ।
ਤੇਰੀ ਮਿੱਟੀ ਨਾਲ ਸ਼ਿਕਵੇ ਕਰਨੇ ।
ਮੜ੍ਹੀਆਂ ਹੂੰਝਣ ਚੱਲੀ ਹਾਂ ।
ਦਿਲ ਦੀ ਗੱਲ ਨਾ ਸਮਝੇ ਕੋਈ ।
ਕਿਸੇ ਕੋਲ ਕਦੇ ਬਹਿ ਨਾ ਰੋਈ ।
ਦਿਲ ਤੋਂ ਛਿਛੜੇ ਲਹਿ ਲਹਿ ਡਿੱਗੇ ।
ਅੱਲੇ ਜ਼ਖ਼ਮ ਨਾ ਖੁਰਕੇ ਕੋਈ ।
ਵਿਹਾਰੀ ਕਰਦੀ ਗੱਲੀਂ ਆਂ ।
ਤੇਰੀ ਮਿੱਟੀ ਨਾਲ ਸ਼ਿਕਵੇ ਕਰਨੇ ।
ਮੜ੍ਹੀਆਂ ਹੂੰਝਣ ਚੱਲੀ ਹਾਂ ।
ਜੱਗ ਨੇ ਦੇ 'ਤੀ ਚਿੱਟੀ ਲੋਈ ।
ਸੱਧਰ ਅੰਦਰੋਂ ਇੱਕ ਨਾ ਮੋਈ ।
ਹੱਟੀ ਵਿਕਦੇ ਸੂਹੇ ਲੀੜੇ ।
ਚੂੜੀਆਂ ਦੇ ਨਾਲ ਟੰਗੇ ਕਲੀਰੇ ।
ਮੇਰਾ ਵੱਸ ਚੱਲੇ ਝੱਟ ਪਾ ਲਾਂ' ।
ਲੋਕੀਂ ਕਹਿਣਗੇ, ਤੂੰ ਅਵੱਲੀ ਆਂ?
ਤੇਰੀ ਮਿੱਟੀ ਨਾਲ ਸ਼ਿਕਵੇ ਕਰਨੇ ।
ਮੜ੍ਹੀਆਂ ਹੂੰਝਣ ਚੱਲੀ ਹਾਂ ।
