ਤੇਰੇ ਮੁਖ ਦੇ ਨਜ਼ਾਰੇ ਦੇਖਦੀ ਹਾਂ ।
ਮੈਂ ਜਦ ਵੀ ਚੰਨ ਤਾਰੇ ਦੇਖਦੀ ਹਾਂ।
ਮੈਂ ਦੇਖਾਂ ਬੰਦ ਬੂਹੇ ਬਾਰੀਆਂ ਸਭ,
ਤੇ ਖੁੱਲੇ ਦਿਲ ਦੁਆਰੇ ਦੇਖਦੀ ਹਾਂ ।
ਉਹਦਾ ਹੌਲੀ ਜਿਹੀ ਆ ਕੇ ਹੱਥ ਫੜਨਾ
ਤੇ ਜੁੜਦੇ ਹੱਥ ਚਾਰੇ ਦੇਖਦੀ ਹਾਂ ।
ਮੇਰਾ ਫਿਰ ਪਿਆਰ ਦੀ ਕੁਈ ਬਾਤ ਪਾਉਣਾ
ਤੇ ਫਿਰ ਉਸ ਦੇ ਹੁੰਗਾਰੇ ਦੇਖਦੀ ਹਾਂ ।
ਉਹ ਦਾ ਬੇਬਸ ਜਿਹਾ ਚਿਹਰਾ ਬਣਾਉਣਾ
ਤੇ ਹੱਸਣਾ ਬੇ ਮੁਹਾਰੇ ਦੇਖਦੀ ਹਾਂ ।
ਮੇਰੀ ਕਿਸਮਤ ਦਾ ਕੇਹਾ ਸੌਰਮੰਡਲ
ਮੈਂ ਟੁੱਟੇ ਸਭ ਸਿਤਾਰੇ ਦੇਖਦੀ ਹਾਂ ।
ਕਦੇ ਚਾਵਾਂ ਦਾ ਇਕ ਦਰਿਆ ਸੀ ਵਹਿੰਦਾ
ਜੋ ਅੱਜ ਬਹਿ ਕੇ ਕਿਨਾਰੇ ਦੇਖਦੀ ਹਾਂ ।
