ਤੇਰੇ ਨੈਣਾਂ ਦੇ ਵਿਚ ਐਵੇਂ ਮੈਂ ਆਪਣੀ ਜ਼ਿੰਦਗੀ ਡੋਬੀ ।
ਜਿਵੇਂ ਡੋਬੀ ਏ ਬੇੜੀ ਤੂੰ ਕਿਸੇ ਨਈਂ ਇੰਜ ਕਦੀ ਡੋਬੀ ।
ਨਾ ਛੱਡਿਆ ਦੁਨੀਆ ਜੋਗਾ ਨਾ ਛੱਡਿਆ ਦੀਨ ਦੇ ਕਾਬਿਲ,
ਓ ਬੁੱਤਾ! ਕੀ ਕਹਾਂ ਤੈਨੂੰ ਤੂੰ ਮੇਰੀ ਬੰਦਗੀ ਡੋਬੀ ।
ਸਗੋਂ ਕੁਝ ਭਾਰ ਹੌਲਾ ਕਰ ਗਈ ਏ ਰਾਹਜ਼ਨੀ ਤੇਰੀ,
ਮੇਰਾ ਕੀ ਵਿਗੜਿਆ ਜ਼ਾਲਿਮ ਤੂੰ ਆਪਣੀ ਰਾਹਬਰੀ ਡੋਬੀ ।
ਬੜੀ ਬੇਇਜ਼ਤੀ ਸੀ ਜੇ ਉਲਟ ਜਾਂਦੀ ਕਿਨਾਰੇ ਤੇ,
ਮੈਂ ਡੂੰਘੇ ਪਾਣੀਆਂ ਅੰਦਰ ਲਿਜਾ ਕੇ ਬੇਬਸੀ ਡੋਬੀ ।
ਲਉ ਮਨਜ਼ੂਰ ਹੈ ਦੋਹਾਂ ਧਿਰਾਂ ਦਾ ਫ਼ੈਸਲਾ ਮੈਨੂੰ,
ਕਿਸੇ ਦਾ ਹੱਥ ਸੀ ਬਰਸਰ ਮੈਂ ਆਪਣੇ ਆਪ ਈ ਡੋਬੀ ।
ਜੇ ਹੁਣ ਉਹ ਦੋਸਤੀ ਤੋੜੇ ਕੀ ਆਖਾਂ ਦੋਸਤੋ ਉਸ ਨੂੰ,
ਜ੍ਹਿਦੇ ਨੈਣਾਂ ਦੀ ਆਖ਼ਤ ਤੇ ਮੈਂ ਦਿਲ ਦੀ ਦੋਸਤੀ ਡੋਬੀ ।
