ਤੇਰੀ ਮਹਿਫ਼ਲ ਦੇ ਰੰਗ ਵੇਖੇ ਨੇ,
ਤੇਰੀ ਮਹਿਫ਼ਲ ਬੇਰੰਗ ਹੋਵੇਗੀ।
ਹੁਸਨ ਤੇ ਇਸ਼ਕ ਦਾ ਜੇ ਮੇਲ ਨਹੀਂ,
ਤੇਰੀ ਮਹਿਫ਼ਲ ਚ ਜੰਗ ਹੋਵੇਗੀ।
ਸੂਲੀ ਉਤੇ ਵੀ ਹੱਕ ਦੀ ਖਾਤਰ,
ਆਸ਼ਕਾਂ ਦਾ ਜਨੂੰਨ ਬੋਲੇਗਾ
ਮਰਨ ਵਾਲਾ ਜੇ ਬੋਲ ਨਾ ਸਕਿਆ,
ਮਰਨ ਵਾਲੇ ਦਾ ਖ਼ੂਨ ਬੋਲੇਗਾ
ਹਰ ਪਿਆਕਲ ਦੇ ਤੜਫਦੇ ਦਿਲ ਚੋਂ
ਹਾਓਕਾ ਪਰਲੋ ਸਮਾਨ ਉਠੇਗਾ,
ਹਰ ਪਿਆਲੀ ਚੋਂ ਅੱਗ ਭੜਕੇਗੀ,
ਅੱਗ ਦਾ ਇਕ ਤੂਫ਼ਾਨ ਉੱਠੇਗਾ।
ਜ਼ੁਲਮ ਦੀ ਰਾਤ ਮੁੱਕ ਜਾਣੀ ਏ,
ਹੋਣਾ ਹਰ ਹਾਲ ਚ ਸਵੇਰਾ ਏ।
ਤੇਰਾ "ਮੁਸ਼ਤਾਕ " ਸੱਚ ਕਹਿੰਦਾ ਏ,
ਅੱਜ ਤੇਰਾ ਏ ਕਲ੍ਹ ਮੇਰਾ ਏ।
