ਤੇਰੀ ਜ਼ਾਤ ਤੇ ਆਸਾਂ ਮੈਨੂੰ, ਹੋਰ ਕਿਸੇ ਤੇ ਮਾਣਾ ਨਹੀਂ ।
ਜਿਸ ਵੀ ਉਹਦੇ ਦਰ ਤੋਂ ਮੰਗਿਆ ਖ਼ਾਲੀ ਉਹ ਪਰਤਾਣਾ ਨਹੀਂ ।
ਸਿੱਧੀ ਵਾਟ ਤੇ ਟੁਰਦਾ ਜਾਵੀਂ, ਸਾਈਆਂ ਨੇ ਫਰਮਾਇਆ ਸੀ,
ਇੱਕੋ ਥਾਂ ਤੋਂ ਝੋਲੀ ਭਰ ਲੈ, ਥਾਂ ਥਾਂ ਸ਼ੀਸ਼ ਨਿਵਾਣਾ ਨਹੀਂ ।
ਬੀਤੇ ਬਾਰੇ ਕਿਉਂ ਮੈਂ ਸੋਚਾਂ, ਬੀਤੇ ਨੇ ਕਦ ਆਉਣਾ ਹੱਥ,
ਆਵਣ ਵਾਲਾ ਕੱਲ੍ਹ ਏ ਮੇਰਾ, ਮਾਜ਼ੀ ਨੂੰ ਦੁਹਰਾਉਣਾ ਨਹੀਂ ।
ਜੀਣਾ ਮਰਨਾ ਇੱਕੋ ਗੱਲ ਏ, ਮਰ ਕੇ ਵੀ ਕਈ ਜੀਂਦੇ ਨੇ,
ਰੋਜ਼ ਕਿਆਮਤ ਤੀਕਰ ਸੱਚਿਆਂ ਮਿੱਟੀ ਥੱਲੇ ਆਣਾ ਨਹੀਂ ।
'ਪੋਰਸ' ਵਰਗੇ ਟੁਰ ਗਏ ਏਥੋਂ ਜਿਹੜੇ ਸ਼ਾਨਾਂ ਵਾਲੇ ਸਨ,
ਉੱਥੇ ਪੱਕੇ ਬੰਨ੍ਹ ਕੀ ਲਾਣੇ, ਜਿੱਥੇ ਅਸਲ ਟਿਕਾਣਾ ਨਹੀਂ ।
