ਤ੍ਰਿੰਞਣ ਵਿਚ ਚਰਖ਼ੇ ਡਾਹ ਕੇ,
ਮਾਹੀਆ ਵੇ ਮਾਹੀਆ,
ਹੁਣ ਕੁੜੀਆਂ ਕਰਦੀਆਂ ਗੱਲਾਂ ।
ਮੈਨੂੰ ਸੱਭੇ ਕਰਦੀਆਂ ਟੋਕਾਂ ।
ਮੈਂ ਕਿਵੇਂ ਉਨ੍ਹਾਂ ਨੂੰ ਰੋਕਾਂ ।
ਉਹ ਗੁੱਝੀਆਂ ਰਮਜ਼ਾਂ ਮਾਰਨ ।
ਘੜਿਆਂ ਨੂੰ ਡੋਬਣ ਤਾਰਨ ।
ਸੋਹਣੀ ਦੇ ਕਿੱਸੇ ਛੇੜਨ,
ਸੱਸੀ ਦੀਆਂ ਗਾਵਣ ਝੋਕਾਂ
ਮੈਂ ਕਿਵੇਂ ਉਨ੍ਹਾਂ ਨੂੰ ਰੋਕਾਂ ।
ਸੱਜਣਾ ਵੇ ਸੱਜਣਾ !
ਲੱਗੀਆਂ ਨੂੰ ਔਖਾ ਕੱਜਣਾ,
ਇਕ ਦਿਨ ਸੀ ਘਾਗਾ ਭੱਜਣਾ ।
ਮੈਂ ਕਿਸ ਕਿਸ ਤੋਂ ਮੂੰਹ ਮੋੜਾਂ ।
ਕਿਸ ਕਿਸ ਨਾਲ ਸਾਂਝਾਂ ਤੋੜਾਂ ।
ਮੈਨੂੰ ਜੱਗ ਦੇ ਮਿਹਣੇ ਚੰਨਾਂ ।
ਤ੍ਰਿੰਞਣ ਵਿਚ ਚਰਖ਼ੇ ਡਾਹ ਕੇ
ਹੁਣ ਗੱਲਾਂ ਕਰਦੀਆਂ ਰੰਨਾਂ ।
