ਤੂੰ ਪੁੱਤ ਦਰਿਆਵਾਂ ਦਾ
ਅਸਾਂ ਵਗਣ ਨ ਦੇਣਾ,
ਤੈਨੂੰ ਜੂਹ ਪਰਾਈ ਵਿਚ
ਅਸਾਂ ਫਬਣ ਨ ਦੇਣਾ।
ਤੇਰੇ ਲਸ਼ਕਰ ਚੜ੍ਹਦੇ ਵੇ
ਤੇਰੀ ਬਾਤ ਹੀ ਕਰਦੇ ਵੇ,
ਇਕ ਦੀਵੇ ਖ਼ਾਤਰ ਪਰ
ਅਸਾਂ ਗਗਨ ਨ ਦੇਣਾ—
ਤੂੰ ਪੁੱਤ ਦਰਿਆਵਾਂ ਦਾ
ਅਸਾਂ ਵਗਣ ਨਾ ਦੇਣਾ।
ਹੜ੍ਹ ਚੜ੍ਹੀਆਂ ਵਾਹਰਾਂ ਦੇ
ਰੰਗ ਲੰਮੀਆਂ ਨਾਰਾਂ ਦੇ,
ਸ਼ਾਹ ਕਾਲੇ ਸਾਵਨ ਨੂੰ
ਰਾਹ ਵਗਣ ਨ ਦੇਣਾ—
ਤੂੰ ਪੁੱਤ ਦਰਿਆਵਾਂ ਦਾ
ਅਸਾਂ ਵਗਣ ਨ ਦੇਣਾ।
ਅਸਾਂ ਘੁੰਡ ਵਿਚ ਲੜਣਾ ਵੇ
ਤੈਨੂੰ ਜੁਗਨੂੰ ਕਰਨਾ ਵੇ-
ਚੰਨ ਈਦ ਦਾ ਬੰਨਿਆਂ 'ਤੇ
ਅਸਾਂ ਜਗਣ ਨ ਦੇਣਾ—
ਤੂੰ ਪੁੱਤ ਦਰਿਆਵਾਂ ਦਾ
ਅਸਾਂ ਵਗਣ ਨ ਦੇਣਾ।
ਤੇਰਾ ਤਪਸ਼ਾ ਝੱਖੜਾਂ ਤੇ
ਬੰਨ੍ਹ ਰੱਖਿਆ ਸੱਥਰਾਂ ਤੇ,
ਕੁੱਲ ਹੁਸਨ ਦੀ ਜੂਹ ਬਖ਼ਸ਼ੀ
ਅਸਾਂ ਸੱਜਣ ਨ ਦੇਣਾ-
ਤੂੰ ਪੁੱਤ ਦਰਿਆਵਾਂ ਦਾ
ਅਸਾਂ ਵਗਣ ਨ ਦੇਣਾ-
ਤੈਨੂੰ ਜੂਹ ਪਰਾਈ ਵਿਚ
ਅਸਾਂ ਫਬਣ ਨ ਦੇਣਾ।
