ਟੁੱਟ ਕੇ ਸੁਪਨੇ ਜੋ ਤਾਰੇ ਬਣ ਗਏ ਨੇ ।
ਕਹਿਕਸ਼ਾਂ ਦੇ ਉਹ ਨਜ਼ਾਰੇ ਬਣ ਗਏ ਨੇ ।
ਝੀਲ ਅੰਦਰ ਡੁੱਬਿਆ ਸੂਰਜ ਦਾ ਸਾਇਆ
ਕਈ ਫ਼ਸਾਨੇ ਓਸ ਬਾਰੇ ਬਣ ਗਏ ਨੇ ।
ਮੈਂ ਤਾਂ ਬਾਲ਼ੇ ਸੀ ਮੁਹੱਬਤ ਦੇ ਹੀ ਦੀਵੇ
ਕਿਸ ਹਵਾ ਦਿੱਤੀ ਸ਼ਰਾਰੇ ਬਣ ਗਏ ਨੇ ?
ਅਰਥ ਬਦਲੇ ਨੇ ਦੁਆਵਾਂ ਦੇ ਕਿਵੇਂ ਹੁਣ
ਬਦ ਦੁਆ ਵਰਗੇ ਪਸਾਰੇ ਬਣ ਗਏ ਨੇ ।
ਯਾ ਖੁਦਾ ! ਕਿਸ ਦੇ ਰਲੇ ਨੇ ਅੱਥਰੂ ਇਹ
ਮਿੱਠੜੇ ਚਸ਼ਮੇ ਵੀ ਖ਼ਾਰੇ ਬਣ ਗਏ ਨੇ ।
ਅਣ ਪੜ੍ਹੇ ਪੰਨੇ ਕਿਸੇ ਇਤਹਾਸ ਵਿੱਚੋਂ
ਜਦ ਪੜ੍ਹੇ ਚਾਨਣ ਮੁਨਾਰੇ ਬਣ ਗਏ ਨੇ।
ਆ ਗਿਆ ਹੈ ਕਿਉਂ ਸੁਮੈਰਾ ਜ਼ਲਜ਼ਲਾ ਇਹ
ਦੇਖਦੇ ਹੀ ਮਹਿਲ ਢਾਰੇ ਬਣ ਗਏ ਨੇ ।
