ਉਦਾਸ ਹਾਂ ਮੈਂ ਤੇ ਹਵਾ ਮੇਰੇ ਨਾਲ
ਖਹਿ ਕੇ ਲੰਘਦੀ ਹੈ
ਮੇਰੇ ਦਿਲ ਦੀ ਧੜਕਣ ਕੋਲੋਂ
ਸਾਹਾਂ ਦਾ ਮੁੱਲ ਮੰਗਦੀ ਹੈ ।
ਠੰਡੀ ਬਰਫ਼ ਇਹਨਾਂ ਗਲੀਆਂ ਦੀ
ਕਲ੍ਹ ਸੀ ਖਚਰਾ ਹਾਸਾ ਹੱਸਦੀ
ਅੱਜ ਉਹ ਪਿਘਲ ਪਿਘਲ ਕੇ ਮੇਰੇ
ਚੰਦਰੇ ਨੈਣਾਂ ਥਾਣੀਂ ਵੱਗਦੀ
ਕਿਧਰੋਂ ਰੇਤ ਕੁਪੱਤੀ ਉੱਡ ਕੇ
ਮੇਰਾ ਸੀਨਾ ਡੰਗਦੀ ਹੈ
ਉਦਾਸ ਹਾਂ ਮੈ ਤੇ ਹਵਾ ਮੇਰੇ ਨਾਲ
ਖਹਿ ਕੇ ਲੰਘਦੀ ਹੈ
ਮੇਰੇ ਦਿਲ ਦੀ ਧੜਕਣ ਕੋਲੋਂ
ਸਾਹਾਂ ਦਾ ਮੁੱਲ ਮੰਗਦੀ ਹੈ ।
ਨਾਲ ਸਿਦਕ ਦੇ ਵੱਗਦੀਏ ਨਦੀਏ
ਮੇਰਾ ਇਕ ਹੰਝੂ ਲੈ ਜਾਵੀਂ
ਉਛਲਦੇ ਖਾਰੇ ਸਾਗਰ ਵਿੱਚ
ਇਕ ਤਿੱਪ ਖਾਰੀ ਹੋਰ ਮਿਲਾਵੀਂ
ਮੇਰੀ ਰੂਹ ਤਾਂ ਹੰਝੂਆਂ ਦੀ ਹੁਣ
ਬੇ-ਬਸੀ ਤੋਂ ਸੰਗਦੀ ਹੈ
ਉਦਾਸ ਹਾਂ ਮੈਂ ਤੇ ਹਵਾ ਮੇਰੇ ਨਾਲ
ਖਹਿ ਕੇ ਲੰਘਦੀ ਹੈ
ਮੇਰੇ ਦਿਲ ਦੀ ਧੜਕਣ ਕੋਲੋਂ
ਸਾਹਾਂ ਦਾ ਮੁੱਲ ਮੰਗਦੀ ਹੈ ।
ਜੀ ਕਰਦਾ ਮੈਂ ਆਪਣੇ ਪਿੰਡ ਦੇ
ਸੁੱਕਿਆਂ ਖੇਤਾਂ ਨੂੰ ਮਿਲ ਆਵਾਂ
ਰੋਂਦੀਆਂ ਫ਼ਸਲਾਂ ਦੇ ਗਲ ਲੱਗ ਕੇ
ਥੋੜ੍ਹੀ ਪੀੜਾ ਮੰਗ ਲਿਆਵਾਂ
ਪਰ ਓਥੇ ਹਰ ਦਾਣੇ ਨੂੰ
ਹਰ ਸੁਬਹ ਸੂਲੀ ਤੇ ਟੰਗਦੀ ਹੈ
ਉਦਾਸ ਹਾਂ ਮੈਂ ਤੇ ਹਵਾ ਮੇਰੇ ਨਾਲ
ਖਹਿ ਕੇ ਲੰਘਦੀ ਹੈ
ਮੇਰੇ ਦਿਲ ਦੀ ਧੜਕਣ ਕੋਲੋਂ
ਸਾਹਾਂ ਦਾ ਮੁੱਲ ਮੰਗਦੀ ਹੈ ।
