ਉਂਜ ਤੇ ਹਾੜ ਦੀ ਧੁੱਪੇ ਜੁੱਸਾ ਸੜਦਿਆਂ ਰਹਿਣਾ ।
ਖ਼ਾਬਾਂ ਦੇ ਵਿੱਚ ਜੁਗਨੂੰ ਫੜਦਿਆਂ ਰਹਿਣਾ ।
ਜੱਗ ਦੀਆਂ ਉੱਠੀਆਂ ਰਾਹਵਾਂ ਦਾ ਸਾਹ ਘੁੱਟਣ ਖ਼ਾਤਰ,
ਹੱਥਾਂ ਉੱਤੇ ਦੀਵੇ ਵਾਂਗੂੰ ਬਲ਼ਦਿਆਂ ਰਹਿਣਾ ।
ਅਪਣੇ ਆਪ ਨੂੰ ਚੁੱਪ ਦੀ ਬੁਕਲ ਵਿੱਚ ਲੁਕਾ ਕੇ,
ਲਹੂ ਸੱਧਰਾਂ ਦਾ ਜੁੱਸੇ ਉੱਤੇ ਮਲ਼ਦਿਆਂ ਰਹਿਣਾ ।
ਮੈਂ ਇਹ ਵੱਲ ਸਮੁੰਦਰ ਕੋਲੋਂ ਸਿੱਖ ਲਿਆ ਏ,
ਅੰਦਰੋ-ਅੰਦਰੀ ਰੋਣਾ, ਉੱਤੋਂ ਹਸਦਿਆਂ ਰਹਿਣਾ ।
ਸ਼ਿਅਰ ਕਹਿਣ ਦਾ ਢੰਗ ਨੋਕੀਲਾ ਦੱਸੇ ਉਸਦਾ-
ਫੁੱਲਾਂ ਵਰਗੇ ਬੁੱਲ੍ਹ ਦਾ 'ਸਾਦਿਕ' ਕੰਬਦਿਆਂ ਰਹਿਣਾ ।
