ਵਕਤ ਮਿੱਠੇ ਵਿਚ ਕੁੜੱਤਣ ਦਾ ਰਲਾ ਪਾਂਦਾ ਰਿਹਾ ।
ਸਾਵੀਆਂ ਮਿਰਚਾਂ ਸ਼ਤੂਤਾਂ ਸੰਗ ਵਰਤਾਂਦਾ ਰਿਹਾ ।
ਇਹ ਤੇ ਲੋਕਾਂ ਸਿਰਫ਼ ਲੇਖੇ ਦੇ ਦਿਹਾੜੇ ਜਾਣਨੈਂ,
ਫ਼ਾਇਦਾ ਉਨ੍ਹਾਂ ਨੂੰ ਕੀ ਨੁਕਸਾਨ ਪਹੁੰਚਾਂਦਾ ਰਿਹਾ ।
ਸਾਰੀ ਬਦਰੰਗੀ ਮੇਰੀ ਤੇ ਰੰਗ ਸਾਰਾ ਓਸ ਦਾ,
ਏਸ ਅਟਕਲ ਨਾਲ ਜ਼ਾਲਮ ਤਾਸ਼ ਵਰਤਾਂਦਾ ਰਿਹਾ ।
ਮੈਂ ਸਾਂ ਅਰਜ਼ੀ ਵਾਲੜਾ ਮੇਰਾ ਭਲਾਂ ਕੀ ਜ਼ੋਰ ਸੀ,
ਉਹ ਸੀ ਮਰਜ਼ੀ ਵਾਲੜਾ ਤਾਖ਼ੀਰ ਫ਼ਰਮਾਂਦਾ ਰਿਹਾ ।
ਇਕ ਕਣੀ 'ਅਨਵਰ' ਨਾ ਭੂੰਜੇ ਡਹਿਣ ਦਿੱਤੀ ਓਸ ਨੇ,
ਇਸ ਤਰ੍ਹਾਂ ਬਣਦਾ ਰਿਹਾ ਬੱਦਲ ਕਿ ਤਰਸਾਂਦਾ ਰਿਹਾ ।
