ਆਓ ਨੀ ਸਹੇਲੀਓ,
ਰਲ ਪੀਂਘਾਂ ਪਾਵੀਏ ।
ਇਕੋ ਹੀ ਹੁਲਾਰੇ
ਅਸਮਾਨੀ ਚੜ੍ਹ ਜਾਵੀਏ ।
ਆਈ ਰੁੱਤ ਸੌਣ ਦੀ,
ਚਾਅ ਤੇ ਮਲਾਰ ਵਾਲੀ
ਪਿੱਪਲਾਂ ਦੀ ਛਾਵੇਂ ਲਾਹੀਏ
ਭੁੱਖ, ਨੱਚ ਪਿਆਰ ਵਾਲੀ ।
ਆਓ ਸਈਆਂ ਸਾਰੀਆਂ ਹੀ
ਅੱਜ ਤੀਆਂ ਲਾਵੀਏ ।
ਆਓ ਨੀ ਸਹੇਲੀਓ,
ਰਲ ਪੀਂਘਾਂ ਪਾਵੀਏ ।
ਅਰਸ਼ਾਂ ਤੇ ਬਦਲਾਂ ਦੇ,
ਹੋਵੰਦੇ ਨੇ ਸ਼ੋਰ ਪਏ ।
ਮਸਤੀ ਦੇ ਵਿਚ ਆ ਕੇ,
ਨੱਚਦੇ ਨੇ ਮੋਰ ਪਏ ।
ਆਓ ਆਪ ਨੱਚੀਏ,
ਤੇ ਹੋਰਾਂ ਨੂੰ ਨਚਾਵੀਏ ।
ਆਓ ਨੀ ਸਹੇਲੀਓ,
ਰਲ ਪੀਂਘਾਂ ਪਾਵੀਏ ।
'ਕਿੱਕਲੀ ਕਲੀਰ' ਵਾਲੀ
ਆਓ ਮਿਲ ਖੇਡੀਏ ।
'ਪੱਗ ਮੇਰੇ ਵੀਰ ਵਾਲੀ,'
ਆਓ ਮਿਲ ਖੇਡੀਏ ।
ਆਓ ਇਨ੍ਹਾਂ ਖੇਡਾਂ ਵਿਚ,
ਮਨ ਪਰਚਾਵੀਏ ।
ਆਓ ਨੀ ਸਹੇਲੀਓ,
ਰਲ ਪੀਂਘਾਂ ਪਾਵੀਏ ।
