ਆਓ ਸੋਹਣੇ ਦੇਸ ਪੰਜਾਬ ਦੀ ਰਲਕੇ ਸ਼ਾਨ ਵਧਾਈਏ।
ਸੋਨ-ਸੁਨਹਿਰੀ ਇਸ ਧਰਤੀ ਨੂੰ ਜੱਗ ਦੇ ਵਿਚ ਰੁਸ਼ਨਾਈਏ।
ਇਸ ਧਰਤੀ ਨੂੰ ਕੁਦਰਤ ਨੇ ਹੈ ਬਖ਼ਸ਼ਿਆ ਖ਼ੂਬ ਨਜ਼ਾਰਾ।
ਹਿਮ-ਪਰਬਤ 'ਚੋਂ ਪਾਕ-ਪਵਿੱਤਰ ਵਗਦੀ ਹੈ ਜਲ ਧਾਰਾ।
ਇਸ ਉਪਜਾਊ ਮਿੱਟੀ ਵਿਚੋਂ ਅਪਣੇ ਭਾਗ ਜਗਾਈਏ----
ਏਥੇ ਰਿਸ਼ੀਆਂ-ਮੁਨੀਆਂ, ਪੀਰਾਂ ਰੱਬੀ ਰਮਜ਼ਾਂ ਪਾਈਆਂ।
ਇਹ ਰਮਜ਼ਾਂ ਵੇਦਾਂ-ਰਿਗਵੇਦਾਂ ਵਿਚ ਉਹਨਾਂ ਸਮਝਾਈਆਂ।
ਇਸ ਧਰਤੀ ਦਾ ਕੁੱਲ ਦੁਨੀਆ ਵਿਚ ਉੱਚਾ ਕਲਸ ਸਜਾਈਏ----
ਸੱਚੇ-ਸੁੱਚੇ ਜੀਣ ਦਾ ਬਾਬੇ ਨਾਨਕ ਨੇਮ ਸਿਖਾਇਆ।
ਕਿਰਤ ਕਰਨ ਤੇ ਵੰਡ ਛਕਣ ਦਾ ਮੰਤਰ ਮੂਲ ਪੜ੍ਹਾਇਆ।
ਮੇਰ-ਤੇਰ ਦੇ ਭੇਦ ਮਿਟਾ ਕੇ ਪੰਗਤ ਵਿਚ ਬਹਿ ਜਾਈਏ-----
ਆਓ ਅਪਣੀ ਮਾਂ-ਧਰਤੀ ਤੋਂ ਮਮਤਾ ਦਾ ਵਰ ਮੰਗੀਏ।
ਬਾਰਿ ਪਰਾਏ ਬੈਠ ਨ ਐਵੇਂ ਜਿੰਦ ਸੂਲੀ 'ਤੇ ਟੰਗੀਏ।
ਇਸ ਪੰਜਾਬ ਦੀ ਰਲ ਮਿਲ ਆਪਾਂ ਨਵ-ਤਕਦੀਰ ਬਣਾਈਏ----
ਆਓ ਸੋਹਣੇ ਦੇਸ ਪੰਜਾਬ ਦੀ ਰਲਕੇ ਸ਼ਾਨ ਵਧਾਈਏ।
ਸੋਨ-ਸੁਨਹਿਰੀ ਇਸ ਧਰਤੀ ਨੂੰ ਜੱਗ ਦੇ ਵਿਚ ਰੁਸ਼ਨਾਈਏ।
