ਕੀ ਪਤਾ ਉਸ ਨੇ ਕਦੋਂ ਹੈ ਆਵਣਾ
ਰਾਤ ਐਵੇਂ ਖੜ ਰਹੀ ਤਾਰੇ ਜੜੀ ।
ਬਾਂਗ ਨਾ ਦਿੱਤੀ ਸੁਬ੍ਹਾ ਨੇ ਵੀ ਅਜੇ
ਕਿਸ ਕਾਫ਼ਰ ਨਮਾਜ਼ ਪਹਿਲਾਂ ਜਾਂ ਪੜ੍ਹੀ ।
ਰਾਤ ਸਾਰੀ ਚਾਨਣੀ ਸਿੰਮਦੀ ਰਹੀ
ਤੜਕ ਸਾਰੇ ਇਹ ਕਿੱਥੋਂ ਲਾਲੀ ਚੜ੍ਹੀ ।
ਕੜਕਦੀ ਧੁੱਪੇ ਜੋ ਪੰਛੀ ਬੋਲਿਆ
ਜਾਨ ਉਹਦੀ ਜਿਸਮ ਦੇ ਪਿੰਜਰੇ ਅੜੀ ।
ਕੁਝ ਤਾਂ ਐਵੇਂ ਆਪ ਮੈਂ ਸੰਗਦਾ ਰਿਹਾ
ਕੁਝ ਉਹਦੀ ਅੱਖੀਆਂ 'ਚ ਸੀ ਲੱਜਿਆ ਬੜੀ ।
ਪੱਗ ਬਦਲ ਕੇ ਰੋਜ਼ ਜੋ ਬੰਨ੍ਹਦਾ ਰਿਹਾ
ਓਸ ਦੀ ਲੋਕਾਂ 'ਚ ਹੈ ਚਰਚਾ ਬੜੀ ।
ਕੌਣ ਸੀ ਆਇਆ ਜੋ ਮੇਰੀ ਕਬਰ 'ਤੇ
ਮੂੰਹ ਉਦਾਸੀ ਹੱਥ 'ਚ ਲੈ ਫੁੱਲਝੜੀ ।
