ਤੂੰ ਗੀਤ-ਅਨੂਪ, ਸਰੂਪ-ਜਿਗਰ,
ਤੂੰ ਇਸ਼ਕ-ਲਹਿਰ ਦਾ ਸਾਜ਼-ਹਿਜਰ,
ਸਤਿ-ਜੋਤ-ਅਖੰਡ-ਬ੍ਰਹਿਮੰਡਾਂ ਵਿਚ
ਆਕਾਸ਼, ਪਾਤਾਲ ਨਿਵਾਸ ਤੇਰਾ।
ਧਰਤੀ ਤੇ 'ਕੁੱਦਰਤ' ਅੱਕਸ ਤੇਰਾ,
ਹਰ ਜ਼ੱਰੇ ਵਿਚ ਸਾਕਾਰ ਹੈਂ ਤੂੰ,
ਜੀ-ਦਾਨ-ਦਵੱਯਾ, ਅਚਲ, ਅਟਲ,
ਹਰ ਆਤਮਾਂ ਵਿਚ ਪਰਕਾਸ਼ ਤੇਰਾ।
ਹਰ ਸੁੰਦਰਤਾ ਦੀ ਸੋਹਜ-ਤੜੱਪ-
ਮੈਂ ਭੇਤ ਤੇਰਾ, ਤੂੰ ਨੂਰ ਮੇਰਾ।
ਮਜ਼ਲੂਮ, ਮਸੂਮ, ਅਨਾਥ, ਅਧਨ,
ਹਨ ਰੂਪ ਤੇਰੇ, ਦਿਲ-ਤਾਨ ਮੇਰੀ।
ਮਜ਼ਦੂਰ, ਕਿਸਾਨ, ਇਮਾਨ-ਜਹਾਂ,
ਸਭ ਕਿਰਣ ਤੇਰੀ, ਰਸ ਬੂੰਦ ਮੇਰੀ।
ਹੈ ਕਵਿਤਾ, ਨਿਰਤ ਕਿ ਚਿੱਤ੍ਰ ਕੋਈ
ਮੂਰਤ ਜਾਂ ਨਾਦ ਜਾਂ ਵੇਦ-ਰਿਚਾ,
ਸਭ ਸੱਗਲ-ਪੱਸਾਰ-ਅਕਾਰ ਤੇਰਾ
ਇਕ ਬੂੰਦ ਹੈ ਉਸ ਚੋਂ ਜਾਨ ਮੇਰੀ।
ਦਿਲ ਨਿਰਾਧਾਰ-ਨਿਰਵੈਰ ਤੇਰਾ,
ਮੈਂ ਫੁੱਲ ਤੇਰਾ, ਤੂੰ ਬਾਸ ਮੇਰੀ।
