ਨਹੀਂ ਸੱਜਣੋ, ਉਏ ਨਹੀਂ ਵੀਰੋ,
ਕਾਨੂੰਨ ਅੰਨ੍ਹਾ ਨਹੀਂ ਹੁੰਦਾ
ਕਾਨੂੰਨ ਦੇ ਬੰਨ੍ਹੀ ਅੱਖੀਂ ਪੱਟੀ ਚੋਂ,
ਸਭ ਕੁਝ ਸਾਫ ਦਿਸਦੈ !
ਕਾਨੂੰਨ ਸਾਫ ਪਹਿਚਾਣ ਰਖਦੈ
ਕਿਸ ਦੀ ਰਾਖੀ ਕਦੋਂ ਕਰਨੀ ਐਂ
ਨਹੀਂ ਬਾਈ ਉਏ -
ਕਾਨੂੰਨ ਅੰਨ੍ਹਾ ਨਹੀਂ ਹੁੰਦਾ !
ਜਦੋਂ ਜਕਰਬਰਗ਼ ਦੇ ਜਹਾਜੋਂ ਉੱਤਰਦੇ ਦੀ,
ਕਾਨੂੰਨੀ ਹੱਥ ਨਲੀ ਪੂੰਝ ਰਹੇ ਸਨ,
ਤੇ ਬਿਲ ਗੇਟਸ ਦੇ ਜਹਾਜ਼ ਮੂਹਰੇ
ਸੁੱਚੇ ਕੀਤੇ ਕਾਨੂੰਨੀ ਹੱਥ
ਲਾਲ ਗਲੀਚੇ ਵਿਛਾ ਰਹੇ ਸਨ-
ਓਸੇ ਵੇਲੇ ਝਾਰਖੰਡ ਵਿੱਚ
ਮੋਟਰਸਾਈਕਲ ਤੇ ਖੁੱਲ੍ਹੀਆਂ ਹਵਾਵਾਂ ਮਾਣਦੀ
ਦੁਨੀਆ ਘੁੰਮਣ ਆਈ ਸਪੈਨਿਸ ਕੁੜੀ ਨਾਲ
ਸਮੂਹਿਕ ਬਲਾਤਕਾਰ ਹੋ ਰਿਹਾ ਸੀ !
ਨਹੀਂ ਵੀਰੋ -
ਕਾਨੂੰਨ ਬੋਲਾਂ ਵੀ ਨਹੀਂ ਹੁੰਦਾ
ਪਰ, ਜਹਾਜ਼ ਚ ਆਏ ਖਾਸ ਬੰਦੇ ਦੇ
ਨੱਕ ਸੁਣਕਣ ਦੀ ਆਵਾਜ਼ ਨਾਲੋਂ
ਖੁੱਲ੍ਹੀ ਫਿਜ਼ਾ ਨੂੰ ਮਾਪਣ ਦੀ ਇਛੁੱਕ
ਸਧਾਰਨ ਸਪੈਨਿਸ਼ ਕੁੜੀ ਦੀ ਚੀਕ ਤਰੰਗ
ਕਾਨੂੰਨੀ ਕੰਨਾਂ ਤੱਕ ਪਹੁੰਚਦੀ ਤਾਂ ਹੈ
ਭਾਵੇਂ ਹੌਲੀ ਪਹੁੰਚਦੀ ਐ !
ਭਰਾਵੋ ਕਾਨੂੰਨ ਦੀ ਤੱਕੜੀ-
ਸਭ ਜਾਣਦੀ ਐ ਸਾਰੇ ਨਾਪ-ਤੋਲ
ਤੇ ਜਾਣਦੀ ਐ ਮਾਪ-ਦੰਡ
ਤੱਕੜੀ ਸਭ ਜਾਣਦੀ ਆ -
ਕਿਸ ਨੂੰ ਸਿੱਕਿਆਂ ਨਾਲ ਤੋਲਨੈ,
ਤੇ ਕਿਹੜੇ ਪਲੜੇ ਪੱਥਰ ਪੈਣੇ ਆਂ !
ਨਹੀਂ, ਕਾਨੂੰਨ ਅੰਨ੍ਹਾ-ਬੋਲਾ ਨਹੀਂ ਹੁੰਦਾ
ਕਾਨੂੰਨ ਨੂੰ ਸਭ ਸੁਣਦਾ ਐ
ਸਭ ਦਿਸਦਾ ਹੈ !
ਸੱਚੀਂ ! ਮੈਨੂੰ ਤਾਂ ਕਾਨੂੰਨ ਦੇ
ਤੀਜਾ ਨੇਤਰ ਵੀ ਲਗਦੈ !
