ਘੜੀ ਗਾਏ ਗੀਤ ਇਕ,
'ਟਿਕ ਟਿਕ, ਟਿਕ ਟਿਕ' ।
ਜ਼ਿੰਦਗੀ ਦੀ ਰਾਹ ਪੈਰ
ਪਾਵਣਾ ਹੀ ਜ਼ਿੰਦਗੀ ਹੈ,
ਜ਼ਿੰਦਗੀ ਦਾ ਕੋਈ ਗੀਤ-
ਗਾਵਣਾ ਹੀ ਜ਼ਿੰਦਗੀ ਹੈ,
ਜ਼ਿੰਦਗੀ ਦੇ ਪੈਂਡੇ ਨੂੰ
ਪੁਲੰਘ, ਬਹਿ ਨ ਟਿਕ ਟਿਕ !'
ਘੜੀ ਗਾਏ ਗੀਤ ਇਕ,
'ਟਿਕ ਟਿਕ, ਟਿਕ ਟਿਕ' ।
ਘੜੀ ਗਾਏ ਗੀਤ ਇਕ :
'ਕਾਹਨੂੰ ਬੈਠਾ ਝੂਰਨਾ ਏਂ ?
ਮੇਰੇ ਵਾਂਗ ਚੱਲ, ਮੈਨੂੰ-
ਕਾਹਨੂੰ ਪਿਆ ਘੂਰਨਾ ਏਂ ?
ਜਿੱਤ ਔਖੇ ਪੈਂਡਿਆਂ ਨੂੰ,
ਕਰਕੇ ਤੂੰ ਇਕ ਇਕ' ।
ਘੜੀ ਗਾਏ ਗੀਤ ਇਕ,
'ਟਿਕ ਟਿਕ, ਟਿਕ ਟਿਕ' ।
ਘੜੀ ਗਾਏ ਗੀਤ ਇਕ :
'ਜ਼ਿੰਦਗੀ ਦੀ ਰਾਹ ਉੱਤੇ
ਪੈਰ ਤੋਲ ਤੋਲ ਰੱਖ,
ਆਪਣੀ ਤੂੰ ਜ਼ਿੰਦਗੀ ਨੂੰ
ਤੁਰਦੀ ਅਡੋਲ ਰੱਖ,
ਜਿਵੇਂ ਰੇਲ ਤੁਰਦੀ ਏ
ਛਿਕ ਛਿਕ, ਛਿਕ ਛਿਕ' ।
ਘੜੀ ਗਾਏ ਗੀਤ ਇਕ,
'ਟਿਕ ਟਿਕ, ਟਿਕ ਟਿਕ' ।
