ਵ੍ਹਾਈਟ ਹਾਊਸ ਅਨੁਸਾਰ ਟਰੰਪ ਅਮਰੀਕਾ ਵਿੱਚ ਟਿਕਟੌਕ 'ਤੇ ਪਾਬੰਦੀ ਦੀ ਆਖਰੀ ਮਿਤੀ ਵਧਾਉਣਗੇ

ਵ੍ਹਾਈਟ ਹਾਊਸ ਦੀ ਪ੍ਰੈਸ ਸਕੱਤਰ ਕੈਰੋਲੀਨ ਲੀਵਿਟ ਨੇ ਮੰਗਲਵਾਰ ਨੂੰ ਕਿਹਾ, "ਰਾਸ਼ਟਰਪਤੀ ਟਰੰਪ ਇਸ ਹਫ਼ਤੇ ਟਿਕਟੌਕ ਨੂੰ ਚਾਲੂ ਰੱਖਣ ਲਈ ਇੱਕ  ਕਾਰਜਕਾਰੀ ਆਦੇਸ਼ 'ਤੇ ਦਸਤਖਤ ਕਰਨਗੇ।" 

ਪ੍ਰਸਿੱਧ ਵੀਡੀਓ ਸ਼ੇਅਰਿੰਗ ਐਪ, ਟਿਕਟੌਕ ਤੇ ਅਮਰੀਕਾ ਵਿੱਚ ਪਾਬੰਦੀ ਲਗਾਈ ਜਾਣੀ ਸੀ ਕਿਉਂਕਿ ਇਸਦੇ ਚੀਨੀ ਮਾਲਕ, ਬਾਈਟਡਾਂਸ ਨੇ ਜਨਵਰੀ ਦੀ ਆਖਰੀ ਮਿਤੀ ਤੱਕ ਇਸਨੂੰ ਇੱਕ ਅਮਰੀਕੀ ਖਰੀਦਦਾਰ ਨੂੰ ਵੇਚਣ ਤੋਂ ਇਨਕਾਰ ਕਰ ਦਿੱਤਾ ਸੀ।

ਟਿਕਟੌਕ ਅਤੇ ਬਾਈਟਡਾਂਸ ਨੇ ਬੀਬੀਸੀ ਤੋਂ ਟਿੱਪਣੀ ਲਈ ਬੇਨਤੀਆਂ ਦਾ ਤੁਰੰਤ ਜਵਾਬ ਨਹੀਂ ਦਿੱਤਾ।

ਲੀਵਿਟ ਨੇ ਕਿਹਾ ਕਿ ਇਹ 90 ਦਿਨਾਂ ਦਾ ਵਾਧਾ "ਇਹ ਯਕੀਨੀ ਬਣਾਏਗਾ ਕਿ ਟਿਕਟੌਕ ਦਾ ਸੌਦਾ ਹੋ ਜਾਵੇ ਤਾਂ ਜੋ ਅਮਰੀਕੀ ਲੋਕ ਇਸ ਭਰੋਸੇ ਨਾਲ ਟਿਕਟੌਕ ਦੀ ਵਰਤੋਂ ਜਾਰੀ ਰੱਖ ਸਕਣ ਕਿ ਉਨ੍ਹਾਂ ਦਾ ਡੇਟਾ ਸੁਰੱਖਿਅਤ ਹੈ।"

ਲੀਵਿਟ ਦੇ ਐਲਾਨ ਤੋਂ ਪਹਿਲਾਂ, ਟਰੰਪ ਨੇ ਬੀਬੀਸੀ ਨੂੰ ਦੱਸਿਆ ਸੀ ਕਿ ਉਹ ਟਿਕਟੌਕ ਬੈਨ ਲਈ ਮਿਆਦ ਵਧਾ ਸਕਦੇ ਹਨ। ਟਰੰਪ ਨੇ ਕਿਹਾ, "ਸਾਨੂੰ ਸ਼ਾਇਦ ਚੀਨ ਦੀ ਮਨਜ਼ੂਰੀ ਲੈਣੀ ਪਵੇਗੀ। ਮੈਨੂੰ ਲੱਗਦਾ ਹੈ ਕਿ ਰਾਸ਼ਟਰਪਤੀ ਸ਼ੀ ਅੰਤ ਵਿੱਚ ਇਸਲਈ ਮਨਜ਼ੂਰੀ ਦੇ ਦੇਣਗੇ।"

ਜਦੋਂ ਟਰੰਪ ਨੂੰ ਪੁੱਛਿਆ ਗਿਆ ਕਿ ਕੀ ਉਨ੍ਹਾਂ ਕੋਲ ਸਮਾਂ ਸੀਮਾ ਵਧਾਉਣ ਦਾ ਕਾਨੂੰਨੀ ਆਧਾਰ ਹੈ, ਤਾਂ ਉਨ੍ਹਾਂ ਨੇ ਜਵਾਬ ਦਿੱਤਾ ਸੀ ਕਿ ਅਸੀਂ ਕਰਦੇ ਹਾਂ। ਟਰੰਪ ਵੱਲੋਂ ਬੈਨ ਦੀ ਮਿਆਦ ਅੱਗੇ ਵਧਾਉਣਾ ਕਾਂਗਰਸ ਦੀ ਇੱਛਾ ਦੇ ਉਲਟ ਹੈ, ਜਿਸਨੇ ਪਿਛਲੇ ਸਾਲ ਇਸਦੀ ਵਿਕਰੀ ਜਾਂ ਪਾਬੰਦੀ ਦੇ ਆਦੇਸ਼ ਨੂੰ ਪਾਸ ਕੀਤਾ ਸੀ। ਸਾਬਕਾ ਰਾਸ਼ਟਰਪਤੀ ਜੋਅ ਬਾਈਡਨ ਨੇ ਤੁਰੰਤ ਬਿੱਲ 'ਤੇ ਦਸਤਖਤ ਕਰਕੇ ਇਸਨੂੰ ਕਾਨੂੰਨ ਬਣਾ ਦਿੱਤਾ ਸੀ।

ਇਸ ਕਾਨੂੰਨ ਦਾ ਉਦੇਸ਼ ਉਨ੍ਹਾਂ ਚਿੰਤਾਵਾਂ ਨੂੰ ਦੂਰ ਕਰਨਾ ਸੀ ਕਿ ਟਿਕਟੌਕ ਜਿਸਦੇ 170 ਮਿਲੀਅਨ ਅਮਰੀਕੀ ਉਪਭੋਗਤਾ ਹਨ, ਨੂੰ ਚੀਨ ਜਾਸੂਸੀ ਅਤੇ ਰਾਜਨੀਤਿਕ ਖੇਤਰ ਵਿੱਚ ਅਸ਼ਾਂਤੀ ਲਈ ਇੱਕ ਸਾਧਨ ਵਜੋਂ ਵਰਤ ਸਕਦਾ ਹੈ।

ਟਰੰਪ ਨੇ 2020 ਵਿੱਚ ਆਪਣੇ ਪਹਿਲੇ ਕਾਰਜਕਾਲ ਦੌਰਾਨ, ਇੱਕ ਅਮਰੀਕੀ ਖਰੀਦਦਾਰ ਨੂੰ ਟਿਕਟੌਕ ਦੀ ਵਿਕਰੀ ਲਈ ਮਜਬੂਰ ਕਰਨ ਦੀ ਕੋਸ਼ਿਸ਼ ਕੀਤੀ ਸੀ। ਪਰ ਪਿਛਲੇ ਸਾਲ, ਟਰੰਪ ਨੇ ਕਿਹਾ ਸੀ ਕਿ ਉਸਨੂੰ ਇਹ ਪਲੇਟਫਾਰਮ ਪਸੰਦ ਆਇਆ ਕਿਉਂਕਿ ਉਸਦਾ ਮੰਨਣਾ ਸੀ ਕਿ ਇਸਨੇ ਉਸਨੂੰ 2024 ਦੀਆਂ ਰਾਸ਼ਟਰਪਤੀ ਚੋਣਾਂ ਜਿੱਤਣ ਵਿੱਚ ਮਦਦ ਕੀਤੀ ਸੀ।

ਟਰੰਪ ਦੇ ਇੱਕਪਾਸੜ ਬੈਨ ਦੀ ਸਮਾਂ ਸੀਮਾ ਵਧਾਉਣ ਕਾਰਨ ਕੁਝ ਵਿਸ਼ਲੇਸ਼ਕਾਂ ਦਾ ਮੰਨਣਾ ਹੈ ਕਿ ਜਿੰਨਾ ਚਿਰ ਟਰੰਪ ਅਹੁਦੇ 'ਤੇ ਹਨ, ਤਦ ਤੱਕ ਇਸਤੇ ਪਾਬੰਦੀ ਨਹੀਂ ਲੱਗ ਸਕਦੀ।

ਟਰੰਪ ਪ੍ਰਸ਼ਾਸਨ ਨੇ ਅਪ੍ਰੈਲ ਵਿੱਚ ਕਿਹਾ ਸੀ ਕਿ ਅਮਰੀਕਾ ਅਤੇ ਚੀਨ ਇੱਕ ਸਮਝੌਤੇ ਦੇ ਨੇੜੇ ਆ ਗਏ ਹਨ ਜਿਸ ਨਾਲ ਟਿਕਟੌਕ ਦੇ ਅਮਰੀਕੀ ਕਾਰਜਾਂ ਦਾ ਬਹੁਮਤ ਨਿਯੰਤਰਣ ਅਮਰੀਕੀ ਮਾਲਕੀ ਅਧੀਨ ਆ ਜਾਂਦਾ ਹੈ, ਪਰ ਉਹ ਸੌਦਾ ਅਜੇ ਸਾਕਾਰ ਨਹੀਂ ਹੋਇਆ ਹੈ।

ਟਰੰਪ ਨੇ ਕਿਹਾ ਹੈ ਕਿ ਉਹ ਟਿਕਟੌਕ ਨੂੰ ਕਲਾਉਡ ਕੰਪਿਊਟਿੰਗ ਦਿੱਗਜ, ਓਰੇਕਲ ਨੂੰ ਵੇਚੇ ਜਾਣ ਲਈ ਸਹਿਮਤ ਹੋਣਗੇ, ਜਿਸਦੇ ਸਹਿ-ਸੰਸਥਾਪਕ ਲੈਰੀ ਐਲੀਸਨ ਟਰੰਪ ਦੇ ਲੰਬੇ ਸਮੇਂ ਤੋਂ ਸਹਿਯੋਗੀ ਹਨ।

ਅਰਬਪਤੀ ਫ੍ਰੈਂਕ ਮੈਕਕੋਰਟ, ਕੈਨੇਡੀਅਨ ਕਾਰੋਬਾਰੀ ਕੇਵਿਨ ਓ'ਲਰੀ, ਅਤੇ ਰੈੱਡਿਟ ਦੇ ਸਹਿ-ਸੰਸਥਾਪਕ ਅਲੈਕਸਿਸ ਓਹਾਨੀਅਨ ਵੀ ਇਸ ਪਲੇਟਫਾਰਮ ਲਈ ਬੋਲੀ ਲਗਾਉਣ ਵਾਲੀ ਇੱਕ ਹੋਰ ਟੀਮ ਦਾ ਹਿੱਸਾ ਹਨ।

ਇਸੇ ਤਰ੍ਹਾਂ ਦੁਨੀਆ ਦੇ ਸਭ ਤੋਂ ਵੱਡੇ ਯੂਟਿਊਬਰ ਮਿਸਟਰ ਬੀਸਟ(MrBeast) ਨੇ ਕਿਹਾ ਹੈ ਕਿ ਉਹ ਇੱਕ ਵੱਖਰੇ ਨਿਵੇਸ਼ਕ ਗਰੁੱਪ ਦੇ ਹਿੱਸੇ ਵਜੋਂ ਟਿਕਟੌਕ ਨੂੰ ਖਰੀਦਣ ਵਿੱਚ ਵੀ ਦਿਲਚਸਪੀ ਰੱਖਦਾ ਹੈ।